Rwom me Kwan i Lira omede kede 18%

29 May 2025, 15:47

By Gom Belmos.

Ngec ame aran me Lim pi Lira City, James Omara Elem omio icokere me kanyicil pi Lira City Council ame obedo aworo iPalm Garden cimo ni rwom me wot otino icukule me Primary oya i%50 imwaka lim me 2019/2020 naka i% 68.2 imwaka lim me 2024/2025.

Omara Elem okobo ni imwaka lim me 2019/2020 , otino anyira nwo tye 7372 kede awobe 7091 dok imwaka lim me 2024/2025 awobe icukule apapat tye 25,744 eka anyira tye 28,258 ame obedo anyut ni otela me Lira City otio tic atek me dongo pwonyere.

En okobo ni rwom me kwan ikin otino(literacy rate) omede ya %47 imwaka lim 2019/2020 naka %72.6 imwaka lim 2024/2025 dok jami magi ocobere pien obedo medo ngec opwonye gi, lok otedero amako cwalo otino ikwan kede ropo wudi kwan.

Elem okobo ni Lira City tye kede neno me coyo opwonye icukule gi, miyo gamente gamo cukule mogo atye icing onywal, dongo rwom me tet icukule gi ikin jami okene mwaka 5 abino anyim wek rwom me kwan kede pwonyere mede malo.

En okobo ni dul tic me pwonyere pwod tye kede tic atek me dongo rwom me kwan ikin otino pien pol otino iP1-P3 pe ngengo coc dok otye ineno me dongo rwom me pwonyere icukule agamente pien rwom me kato peny tye ping ka oporo kede otino icukule acung iwi gi ken gi ikine me mwaka 5 abino anyim.

Amako kop me yotkom, en okobo ni oyabo ka pwonyo dakatal iLira University, ropo yoode idakatal adwong me Lira, omedo rwom me daktale HC3 gin 2 naka iHC4 ote gero dakatal 2 irwom me HC3.

Elem okobo ni rwom me too amon ikare me yac kede nyoode odok ping ya 275 imwaka lim 2019/2020 naka 175 imwaka lim 2024/2025 ikom otino 100,000 ame woto idakatale apapat iLira City.