Maruzi Seed SS Apac okwongo otela anyen me board

6 June 2024, 1:15 pm

By Isaac Newton Abili & Mike Okwang Ogule

RDC me Apac District otyeko ciko otela me Board of Governors ame oyero anyen pi Maruzi Seed Secondary School me bunyu moyo balu me lobo (land title) pi cukul man, itute me gengo kop me lara lobo iyi anyim.

George Abudul, onwongo iceng Adek idiceng tye alok iyuba me kwongo otela me Board of Governor anyen, ame bino telo cukul me Maruzi Seed pi mwaki adek abino anyim.

Abudul, itung ocele, ote dang kwayo otela me cukul man me cako neno me gero guropa, (storeyed building) wek cukul te bedo kede projects apol, ilobo atitidi ame nwongo otye kede.

Aco mayor me Apac Municipality, Patrick Ongom Eyul, ote ciko otela anyen me Board, me tiyo tic karacel iwi meja, wek cukul man te mede dongo kato kan ame otye iye oko.

Moses Otimong, Town Clerk me Apac Municipality ote nyutu yomcunye ikom kite ame cukul me Maruzi Seed tye adongo oyotoyot kede medo kede rwom me kato peny aber meicel ame tye icukul man.

Eng. James Robert Ajal, dok Prime Minister me Lango Cultural Foundation, ame okwongo me bedo wonkom me Board of Governor anyen, ote cikere me tic karacel kede otela me cukul man irwom apupat, itute me kelo dongo apupat, ikin gi wayo mac icukul man.

Donald Aquila Oyera ame obedo headteacher me Maruzi Seed Secondary School, ote pako tela me board
okato, pi tiyo tic atek, pi dongo cukul man, mwaki 3 okato angec.

James Robert Ajal, wonkom me Board anyen bino tic kede jo ocele calo Philips Otim, Tom Superman Opwonya, Florence Omara kede Jaffa Okello, ikin jo ocele.