Radio Apac
UPDF owango bwo rec ame cik ogengo I nam me Kwania
11 November 2026, 2:46 pm
By Abili Isaac Newton and Ogolo Ian Smith
Mony me Uganda People’s Defense Forces, UPDF kede otela ame bwo gwoko nam me Kwania I district me Apac, otyeko wango bwo ame cik ogengo tic kede me mako rec nyige 32,957 ame ka odwoko icente aromo 1,262,080,000 ( Shs 1.2 billion)
Man otimere iceng Aryo otyeno iyonge UPDF timo opotoro me mako bwo cik magi cakere imwaka 2025 kede 2026 pi gengo cik areco I Lake Kwania, dok ikin gi mako rec ame obin owango tye iye; Sein Net (Kokota) nyige 60 ame ka odwoko icente romo Shs million 48, Monofilament Net nyige 29,264, Undersized Net nyige 3,384, Cast Net ( Ponyoka) nyige 3,384, Basket Trap ame obedo nyonyo aromo gin 40 kede en ame ocweo kede alado gin 47, ikin en ocele.
Alubere kede ngec ame otela ame bwo yi nam ocwalo oko, obin otimo opotoro man iwangkwang 9 ducu ame tye I nam me Kwania I district me Apac ikine; Kiga Landing Site, Wansolo, Wigweng, Apalamio, Kampala Kagoi, Acholi-In, Kwibale, Akokoro Main kede kayei landing sites.
Sge. Tumwesigye Revekato, Sector Commander Apac 155 Marine Battalion, ilokere otito ni wango bwo man obedo anyut ni gamente okwero tic kede bwo mede kede cik areco I man.
Tumwesigye omede ni opotoro man pwod bino mede anyim itute me lweny ikom cik areco, dok omede ni obino lubu kede cik ame bwo tic kede nam, ngatoro keken ame obino mako, pi turu cik.
Itung ocele, John Tyang, ame obedo District Fisheries Officer me Apac, otito ni percent 50 me ocik rec ame onwongo otio kede bwo areco, en ame ojale apir gi ote miyo bwo gi bot ogwoko kuc me UPDF iyonge nwongo pwonyere ibot otela ame bwolo gwoko rec, eka percent 50 ocele me wegi bwo magi, ogamo bwo gi tetek icawa me opotoro man.
Andrew Onyuk, RDC me Apac, otito ni gamente okato kede neno me gwoko nam ibeo igengo tic kede Jami areco pi cik, kede dwoko piny wel ocik iwangkwang apupat, pi gwoko anyim kede lonyo me lobo Uganda, Wek pe bale.
Onyuk dang Itung ocele, okwenyoro mony ame otye otimo opotoro I nam me gwokere i buru kede keto awuna-wuna ikom otedero ame omako gi I am kede Jami cik areco, kun titi gi me mako ote lubu gi kede cik.
Aco ilokere ika gure aceli, wonkom LC5 me Apac District, Ambrose Agec Opio, okwao gamente me medo malo wel ocik kede wel yede, medo kede dang nyayo wel landing site, Wek kony inyayo tic bot lwak, acalo pol ajo ame kwo idog nam, odong nono abongo tic iyonge gamente Kato kede cik apupat akwako tic kede nam, dok ikine obedo dwoko piny wel ocik kede dang wel yede I dog wang kwang apupat.
Agec Itung ocele, ocukuru cuny ocik me culu ocolo Wek Kony gamente me goyo myeka kede dongo rwom me cik malo i nam.
Ayo Jane Kawa, ame oloko aka ka ocik me Kayei Landing Site, opako commander me mony UPDF pi bedo kede wat aber medo kede timo opotoro iyore aber abongo bura ikom ocik, kun kwao gamente me poki ocik Jami me cik abeco, Wek geng itic kede Jami cik areco I nam.
Ikom kare man, gamente odwogo piny wel yede naka I 33 , I landing site acel acel ame tye I nam atitino I lobo Uganda.