Cwal Otino ikwano tic cing-Dr Odongo Okune

21 February 2023, 10:05 am

Acoc: Ceaser Ivan Okello

Wonyaci me Tekwaro Lango Eng Dr. Michael Moses Odongo Okune tye amito ni jo me Lango myero lok tam gi ote cako cwalo otino me kwano tic cing ikare ame wel culu pwonyere me cinia tye oyito maluatek woki me wek otino pe but ooko.

Odongo ilokere okobo ni kit ame cukule senior okene tye amedo kede wel cuku kwan nyutu kan aler ni onywal okene i Lango kan tero otino icukul aloyo gi oko kit ame dang pur pe obedo aber imwaka okato ni.

En okobo ni onywal pe myero nen bala anyim otino gi tye ka ipwonyere me cinia ento me dang tero kwano tic cing acalo pwonyere aber ame romo konyo igero anyim otino.

Odongo Okune otito ni jo ame obin omoko tam gi con ote tero otino ikwano tic cing bala; payo kede kubu bao, yubu pii, yubu motoka, gedo kede en okene icawa ni otino gi tye awinyo aber pien ocako nwongo apude cente oko ikwan gi ka iporo kede jo okene ame kwano naka irwom me degree ento te dwogo cen paco mato kong kede jo ape okwano.

Odongo Okune okwao onywal  pe  me weko otino gi ame openyere ikilaci 7 bedo paco pien culu kwan me cinia loo gi oko ento me cwalo otino ni  technical schools wek onwong gini diro ame mio gi oromo kwoyo-kwo aber ikin paco eka paci gi dang te bedo atek.

Acocoki, amemba me parliament me Kole North Dr. Samuel Opio Acuti obedo lok atek tutwal icokere me parliament dang te kwayo ni gamente myero kato kan aler me ngolo wi cukule mogo acung iwi gi ken gi kede en ame obedo mega agamente imedo malu wel cukul.

Opio Acuti okobo ni cukule cinia okene tye amiyo onywal aculu cente adongo-dongo akato cente ame otino akwano University culu ame mito gamente kato me konyo onywal

En tye amito ni gamente myero buny kelo aloka Loka I wel cukul pici pien tye amiyo otino apol akeng nwongo Pwonyere opore pien nwongo pe oromo culu.