Dano ma kato 400 i Pader gunongo kony me maraya me wang

14 August 2026, 19:43

Ki bot Ekel Bonny Daniel

Dano ma romo 400 ma bedo i Pader gunongo kony me wang ki gilaci me kwano buk ma wel ne kato Shs140 million kibot The Women of Pader Uganda ki Community Focus International, dok neno gi tye me konyo dano ma tye ka wok ki peko me wang ki peko me kwano buk.

Dano ma kato 400 ma gibedo i Pader gunongo kony me wang ki gilaci me kwano buk ma wele kato Shs140 million, i kare me yub ma The Women of Pader Uganda kacel ki Community Focus International, CFI, giyubu me konyo jo ma gitye ki peko me wang.

Yub man otime i ceng abic, me nino dwe 14, dwe me aboro mwaka 2026, i gang pa The Women of Pader Uganda i Oloki Lee Cell, Lagwai Parish, Pader Town Council.

Tic man onongo tye pi konyo jo ma i kin gang ma gitye ki peko me wang, tutwale jo ma gitye ka cane me kwano buk.

Ladit ma loyo CFI, Benson Ocan, owaco ni dul man onongo gilaci me kwano buk ki bot Restoring Vision, dul ma tye i Amerika, me konyo lwak ma gitye ki peko me neno.

Ocan owaco ni gilaci acel me kwano buk wel ne romo Shs350,000, ki dano ma kato 400 ma gunongo kony, ma nyutu ni wel kony ma ki poko romo Shs140 million.

En owaco ni gilaci ma ki poko tye ki teko ma pat pat, cake ki 1.0 nio wa i 3.0, me yubu peko pa dano acel acel.

Ocan bene ociko dano ma gunongo gilaci ni pe me cato onyo gimi gi dano mukene, pien gilaci acel acel ki waraga ma daktar ocoyo pire, ma nyutu rwom me wang pa ngat acel acel.

En ocuko cwiny dano me gwoko gilaci maber, ki ociko gi me tic kwede pi kwano buk ma cok, pe pi dwoyo motoka, ngwec, pikipiki onyo tic mukene ma mito neno maber.

Ocan owaco ni jo mapol i kumalo me Uganda gitye ka cane me kwano karatac akwana, lanyut, ginacoya ki jami mukene pien pe gineno maber, ma weko pe ginywako maber i tic me nino ducu.

Ladit maloyo The Women of Pader iyi Uganda ki Pwonye me biacara, Aboga Jacob Brused, owaco ni yub man ki yubu pien dul ni oneno ni wel dano ma tye ka yenyo kony pi peko me wang tye ka mede matek ipader.

Aboga owaco ni miiyo kony bot dano ma gitye ki peko me wang pe obedo gin manyen bot The Women of Pader Uganda, kun tito ni dul ni dong ocwalo dano ma gitye ki peko me wang matek i St. Joseph’s Hospital Eye Clinic Kitgum ki ot yat mukene me nongo kony ma opore.

En owaco ni dul bene tiyo kacel ki St. Joseph’s Hospital, Lacoo ki Ultimate Choice Clinic i Pader, ki ot yat mukene, me neno ni dano ma i gang gi nongo kony me yot kom ma opore.

Aboga owaco ni dul man tye ka keto cwinye i kom konyo lwak, dongo lim, yotkom, kony me cwiny ki yub me yubo kwo pa dano i kabedo ma dul ni tiyo iye.

Auma Irene ma oa ki Pagwari East Cell i Acoro Parish, ma onongo tye kin dano ma gunongo kony, owaco ni en ewinyo pi yub man ki i radio, inge nongo peko me wang ma ocake inge peko me gudu i dwe me adek mwaka man.

Auma owaco ni nongo gilaci me kwano buk bino konye me kwano cim cinge, Baibul ki jami mukene ma dong odoko tek me kwano.

Charles Obitan ma oa ki Ogwaleng Valley i Luna Parish, Pader Town Council, bene owaco ni en pe onongo twero culu wel gilaci me kwano buk, ento dong tye ki pwoc pi nongo pair acel labongo cul.

En onyutu pwoc bot The Women of Pader Uganda ki CFI pi miye gilaci me kwano buk, kun waco ni kony man bino konye me medo rwom me kwano ki tic ne me nino ducu.

CFI owaco ni etye ka yube me dwogo cen i Pader me temo dano ma mito gilaci ma ki coyo pire, konyo dano ma gitye ki peko i kom ki cing, ki jami mukene ma konyo gi.

Dul man bene tye ki yub me pwonyo lutic pa The Women of Pader Uganda, lutela me district ki lutic me yotkom, me medo rwom me tic ki konyo lwak i kom gwoko wang.

Yub man tye i kin tic pa The Women of Pader Uganda ki CFI me medo rwom me nongo kony me yotkom, tutwale pi dano ma gitye ki peko me wang i Pader ki gangi ma cok kwede.