Buwama FM
  Stream radio
Menu
Buwama FM
  2. Security
  3. Abatuuze ba Bukasa beeraliikirivu olw’obumenyi bw’amateeka obweyongedde

Abatuuze ba Bukasa beeraliikirivu olw’obumenyi bw’amateeka obweyongedde

1 September 2026, 8:38 am

Deputy RDC wa Mpigi, Yahaya Katunzi nga ayogerako eri abatuuze be Bukasa mu lukiiko lw’ebyokwerinda

By Nsubuga John

Ebikolwa eby’obumenyi bw’amateeka ebyeyongedde mu kitundu kya Bukasa mu Gombolola ye Kituntu biteeredde abatuuze ku bunkenke.

Ebikolwa ebityoboola amateeka ebitiisa abatuuze mulimu obuliisa maanyi, obutemu, obubbi bwa pikipiki, okubba ebisolo n’emmere, wamu n’okufuuweeta enjaga.

Embeera eno ewawalirizza okutuula kw’olukiiko lw’ebyokwerinda olwetabiddwamu Amyuka RDC wa Mpigi, Katunzi Yahaya n’abayambi be, Ssentebe wa Disitulikiti ye Mpigi Simon Peter Kawuki, ab’ebyokwerinda, poliisi, wamu ne ba ssentebe b’ebyalo, okusala amagezi ku ngeri y’okukkakkanyamu embeera eno.

Mu lukiiko olwatudde mu kabuga ka Bukasa mu Gombolola ye Kituntu, Ssentebe w’ekyalo kya Bukasa-Sambwe, Ssaalongo Ssempereza Fredrick, yategeezezza nti abamu ku baana abazaalibwa mu kitundu kino tebakyakkiriza batuuze kwetaba mu nsonga z’ekyalo, kubanga beekola ebibinja ebyabwe.

Chairperson we Bukasa Sambwe Ssepereza Frederick nga annyonyola embeera yakabinja kabakozi be bikolobero.

Abatuuze bagamba nti embeera eno ebanyigiriza nnyo, ate nga n’eggwanga eriyitibwa poliisi erina okubayamba mu kukuuma obukuumi terina busobozi bumala.

Mu lukiiko luno mwabadde ne mukadde John Bosco Byefasi, eyavumiridde batabani be, ng’abalumiriza okuba mu kibinja ky’ababbi abatigomya ekyalo.

Gombolola ye Kituntu erimu emiruka 10, naye erina abapoliisi 8 bokka abakola ogw’okukuuma obukuumi mu gombolola yonna, ekiviirako abatuuze okwemulugunya ku butaba na bukuumi bumala.

Akulira Poliisi ye Kituntu, Byansi Peter, akkirizza nti poliisi nayo efuna okusoomoozebwa mu kukuuma obukuumi mu gombolola olw’obutaba na basirikale bamala.

Byansi Peter akulira police ye Kituntu nga anyonyola obuzibu bwayitamu okulwanagana n’abamanyi ba mateka.

Ssentebe w’ekyalo kya Bukasa-Sambwe, Ssaalongo Ssempereza Fredrick, agamba nti embeera eno tesaanidde kusuulibwa muguluka, kubanga abantu abakyamu batabuse mu kitundu.

Abatuuze balumiriza nti abakwata ekitundu kino si bantu bava walala, wabula baana ba nzaalwa y’ekitundu abakolagana n’abantu abalala abava ebweru w’ekyalo okubayamba okubba ebintu by’abatuuze.

Amyuka RDC wa Disitulikiti ye Mpigi, Katunzi Yahaya, agambye nti abatuuze nabo balina okwekuuma n’okwenyigira mu byokwerinda, so si kulindirira poliisi yokka okubawa obukuumi.

Amyuka RDC wa Mpigi Yahaya Katunzi ku nsonga yabatigomya abatuuze be Bukasa mu Kituntu.

Ssentebe wa Disitulikiti ye Mpigi, Simon Peter Kawuki, alagidde ba ssentebe b’ebyalo abakakuba ebirayiro byabwe okulonda obukiiko bw’ebyalo obumanyiddwa nga Security Committees, okusobola okwongera amaanyi mu byokwerinda mu byalo byabwe.